• Главная
  • "Ныхас"-ы ног сæрдар - Горæтгæрон районы

Новости

"Ныхас"-ы ног сæрдар - Горæтгæрон районы

IMG 1966Горæтгæрон районы культурæйы Галуаны ацыд "Ныхас"-ы радон конференци. Архайдтой дзы районы сæргълæууæг Гаглойты Алан, Æппæтдунеон æхсæнадон змæлд "Иры Стыр Ныхас"-ы координацион Советы сæрдары 1-аг хæдивæг Еналдыты Хъазыбег, районы сæргълæууæджы хæдивджытæ Багаты Рустам æмæ Къарджиаты Валерий, районы администрацийы адæмимæ куысты фæдыл хайады хицау Абайты Тамарæ, хъæуты администрациты сæргълæуджытæ, хуынд адæм.

IMG 1973Конференцийы архайджытæ сæ рухс нæмттæ лæугæйæ ссардтой, фæстаг рæстæг "Ныхас"-ы уæнгтæй йæ цардæй чи ахицæн, уыдонæн. Уый фæстæ "Иры Стыр Ныхас"-ы Кады гæххæттæй схорзæхджын кодтой районы "Ныхас"-ы секретарь Хуыгаты Людмилæйы.

Æмбырд амыдта районы администрацийы сæргълæууæджы хæдивæг Деметы Славик.

Боны фæткы уыд ахæм фарстатæ: "2018 азæй 2020 азмæ районы "Ныхас"-ы хыгъд"; "Горæтгæрон районы "Ныхас"-ы сæрдар сæвзарын"; "Ныхас"-ы Советы уæнгтæ сæвзарын"; "Ирон адæмы XI съездмæ делегаттæ сæвзарын".

Фыццаг фарстайы фæдыл хыгъдон доклад скодта районы "Ныхас"-ы сæрдары хæстæ æххæстгæнæг Дзуццаты Валерий.

Уый фæстæ раныхас кодтой: Гаглойты Алан, Еналдыты Хъазыбег, Ирыхъæуы "Ныхас"-ы сæрдар Хъæцмæзты Юрий, Михайловскы хъæуы "Ныхас"-ы сæрдары хæстæ æххæстгæнæг Кæркуысты Никъала, Камбилеевкæйы хъæуы "Ныхас"-ы сæрдар Уалыты Мæирбег, Комгæроны хъæуы "Ныхас"-ы сæрдар Болататы Тенгиз, Камбилеевкæйы хъæуы сылгоймæгты Советы сæрдар Тедеты-Бететы Райхан, Ирыхъæуы цæрæг Уæлыгæсты Тамарæ, районы "Ныхас"-ы хистæрты Советы сæрдар Хуыгаты Сослан, меценат Лалыты Левæ (уый майдан "Хæсты сывæллæттæ"-йæ схорзæхджын кодта Дзуццаты Валерийы).

Хыгъдон рæстæг Горæтгæрон районы "Ныхас"-ы куыстæн делегаттæ скодтой рæстæмбис аргъ. Горæтгæрон районы "Ныхас"-ы сæрдарæй æмхъæлæсæй æвзæрст æрцыд Дзуццаты Валерий. Фарстаты фæдыл райстой æмбæлгæ уынаффæтæ.

Æвзæрст ма æрцыдысты районы "Ныхас"-ы Советы уæнгтæ æмæ ирон адæмы XI съездмæ делегаттæ.

Уый фæстæ конференцийы архайджытæ бахастой фæндон, цæмæй Лалыты Левæйæн лæвæрд æрцæуа Горæтгæрон районы Кадджын æмбæстаджы ном.

ГАССИТЫ Моисей. Авторы ист къамтæ.